MONATO
Por skribi al ni
Serĉu en la retpaĝoj de Monato
en la retpaĝoj de Monato

Aliĝu al la senpaga servo Nova!

Moderna vivo

AŬSTRIO

Postulataj: pli severaj punoj

Post multjara kaptiteco de Natascha Kampusch [nataŝa kampuŝ], nun 18-jara, la aŭstra registaro planas pli severan punon pro forrabo de libereco. Tiucele, laŭ la ministrejo pri justico en Vieno, la registaro estigis laborgrupon, kiu prezentos proponojn por fermi truojn en la leĝo koncerne forrabon de libereco kun aŭ sen postulo de elaĉeta mono.

Krimoj, kiel tiu de Wolfgang Priklopil, la forrabinto de Natascha Kampusch, povus esti punataj estontece per maksimume 20 jaroj da malliberigo.

La 44-jara Priklopil forrabis en 1998 la tiam dekjaran knabinon Natascha kaj tenis ŝin ok jarojn en sia hejmo. Baldaŭ post ŝia fuĝo en aŭgusto 2006 li mortigis sin. Pro la fakto, ke Priklopil ne postulis elaĉetan monon, li povus esti kondamnita laŭ la nun valida leĝo al maksimume dek jaroj da malliberigo.

Aŭstraj aŭtoritatoj kaj juristoj emfazas, ke la krimo de Priklopil estas eksterordinare peza. La jurmedicinisto Reinhard Haller kaj la kriminalisto Thomas Müller diris, ke lia psikologia profilo estas nekutima. Wolfgang Priklopil posedis Natascha Kampusch tute kaj volis transformi ŝin en „estaĵon sen volo”.

Evgeni GEORGIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Evgeni Georgiev el Monato (www.monato.net).
Lasta adapto de tiu ĉi paĝo: 2018-04-22
Creative Commons License