MONATO
Por skribi al ni
Serĉu en la retpaĝoj de Monato
en la retpaĝoj de Monato

Aliĝu al la senpaga servo Nova!

Politiko

BALKANO

Prudenta decido

Komence de junio solviĝis definitive la 20-jara konflikto pri landlimoj inter Slovenio kaj Kroatio. La registaroj de la du landoj, ne povante interkonsenti, transdonis la problemon al neŭtrala arbitracia juĝistaro. Ties decidon akceptis ambaŭ registaroj, poste ambaŭ parlamentoj. Tamen la slovena maldekstra opozicio postulis referendumon.

La referendumo okazis post dumonata intensa lobiado. La registaro invitis la popolon akcepti la proponon. Sed la plej forta opozicia partio, Slovena Demokratia Partio, gvidata de Janez Janša, lobiis kontraŭ la interkonsento.

Neniu kuraĝis prognozi la rezulton, ĉar esploroj montris, ke proksimume duono de la popolo estas por kaj duono kontraŭ. Tion konfirmis la rezulto. Partoprenis la referendumon 42 % de la voĉdonrajtigitoj: 51,5 % subtenis la proponon, 48,5 % ne.

Blokado

La decido ne nur solvis 20-jaran konflikton, kiu daŭre venenis la rilaton inter la du landoj, sed ankaŭ ebligis al Slovenio rezigni pri blokado kontraŭ kroataj traktadoj kun EU. Sekve Kroatio verŝajne iĝos nova membro de EU post tri aŭ kvar jaroj.

Tio samtempe kondukos iom post iom al la integriĝo de la iama teritorio de Jugoslavio en EU kaj pro tio al longtempa pacigo de la balkana spaco. La komentoj de pluraj eŭropaj politikistoj estis tre pozitivaj. La prezidanto de la Eŭropa Parlamento, Jerzy Buzek, parolis pri prudenta decido kaj la prezidanto de la Eŭropa Konsilio, Herman Van Rompuy, gratulis la slovenan kancelieron Borut Pahor.

Zlatko TIŜLJAR

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Zlatko Tiŝljar el Monato (www.monato.net).
Lasta adapto de tiu ĉi paĝo: 2017-05-09
Creative Commons License